கருணாநிதி விமர்சனம் பற்றி தனித் தமிழர் சேனை அமைப்பு கருத்து

பெங்களூர்,
பிப். 8: விஜயகாந்த் மீதான பேரவைத் தலைவரின் நடவடிக்கை குறித்து முன்னாள் முதல்வர் கருணாநிதி கூறியிருக்கும் கருத்து, திமுக, தேமுதிக ஆகிய இரு அநாகரீகங்களும் கை கோர்ப்பதாகவே தெரிகிறது என்று தனித் தமிழர் சேனை அமைப்பின் நிறுவனர் க.நகைமுகன் தெரிவித்துள்ளார். அவர் வெளியிட்டுள்ள அறிக்கை: திமுக பொருளாளராக இருந்த எம்.ஜி.ஆர். கடந்த 1972-ல் கட்சி கணக்கை கேட்ட
காரணத்தால், அவர் கட்சியில் இருந்து நீக்கப்பட்டார். இதைத் தொடர்ந்து எம்.ஜி.ஆர். புதிய கட்சித் தொடங்கி, 13 எம்எல்ஏக்களுடன், அக்கட்சியின் சட்டப்பேரவைக் குழுத் தலைவராக கருணாநிதி அரசை விமர்சித்தார். அப்போது சட்டப் பேரவை வளாகத்தில் எம்.ஜி.ஆரை நோக்கி செருப்பு வீசி, ஆளும் கட்சியினர் அநாகரீகமாக நடந்துகொண்டனர்.  1989-ல் எதிர்க் கட்சித் தலைவராக இருந்த இன்றைய முதல்வர் ஜெயலலிதாவின் சேலை கிழிக்கப்பட்டது. விஜயகாந்த் சட்டப் பேரவையில் இருந்து வெளியில் வரும்போது மடிப்பு களையாத உடையுடன் வந்தார். இதுவே சட்டப் பேரவையில் அடக்குமுறை நடக்கவில்லை என்பதற்கு சான்று.  இந்நிலையில்  சட்டப்பேரவையில் அநாகரீகமாக நடந்துகொண்ட விஜயகாந்த் மீது பேரவைத் தலைவர் எடுத்த நடவடிக்கையை அடக்குமுறை என்றும், ஜனநாயகம் உடைக்கப்படுவதாகவும் கருணாநிதி விமர்சித்துள்ளார். இது திமுக, தேமுதிக ஆகிய இரு அநாகரீகங்களும் கை கோர்ப்பதாகவே தெரிகிறது என்று அறிக்கையில் தெரிவித்துள்ளார்.

First Published : 09 Feb 2012 01:12:32 PM IST