ஆழ ஊடுருவும் படையணிக்கு அஞ்சி பதுங்கு குழியில் தங்கிய பிரபாகரன்? - கோத்தபாய

சிறீலங்கா இராணுவத்தினருக்கு சர்வதேச ரீதியாக பாரிய அச்சுறுத்தல் ஏற்பட்டுள்ளதாக பாதுகாப்பு செயலாளர் கோத்தபாய தெரிவித்துள்ளார். இதற்கு அரசியல் உள்நோக்கங்களே பிரதான காரணமென தெரிவித்துள்ளார்.
இறுதி யுத்தத்தின் போது பொதுமக்களை இராணுவத்தினர் கொலை செய்ததாகக் கூறும் குற்றச்சாட்டானது சர்வதேசத்தின் சோடிக்கப்பட்ட கதையாகும் என குற்றம்சாட்டியுள்ளார்.
நாட்டின் எதிரான போலிக் குற்றச்சாட்டுக்களுக்கு உள்நாட்டிலிருந்தும் உதவி ஒத்தாசைகள் வழங்கப்படுகின்றது. எவ்வாறாயினும் எதிரிகளுக்கு அடி பணியாத கொள்கையுடன் சர்வதேச சவால்களுக்கு முகம் கொடுப்போம் என்றும் அவர் குறிப்பிட்டுள்ளார்.

பத்தரமுல்லையில் இடம்பெற்ற இராணுவத்தின் ஊடுருவி தாக்கும் விசேட படையணி தொடர்பான நூல் வெளியிட்டின் போதே மேற்கண்டவாறு தெரிவித்துள்ளார். அவர் மேலும் தெரிவிக்கையில்,
யுத்தம் நடைபெற்ற காலப் பகுதியில் அரசியல் மற்றும் இராணுவத் தலைவர்கள் உட்பட ஏனைய பிரபுகளுக்கு வீட்டை விட்டு வெளியே வர முடியாத சூழ்நிலையே அரச கட்டுப்பாட்டுப் பகுதிகளில் காணப்பட்டது. ஆனால் புலிகளின் கட்டுப்பாட்டில் இருந்த இடத்தில் அவர்கள் சுதந்திரமாக நடமாடினார்கள்.
ஆனால் இந்த சுதந்திரம் எமக்கு காணப்படவில்லை. இவ்வாறானதொரு சூழ்நிலையில் தான் சிறு குழுக்களாக ஆழ ஊடுருவி எதிரிகளை தாக்கியழிக்கும் விசேட படையணியை இராணுவம் ஸ்தாபித்தது. இந்த படையணியின் நடவடிக்கைகளுக்கு அஞ்சி பிரபாகரன் பதுங்கு குழியை விட்டுக் கூட வெளியே வராத நிலை ஏற்பட்டது.
சமாதானப் பேச்சுவார்த்தைகளின் போதும் வடக்கில் விசேட படையணியின் நடவடிக்கைகளை நிறுத்துமாறு புலிகள் வலியுறுத்தி வந்தனர். கடந்த 2005 ஆம் ஆண்டு ஜனாதிபதி மகிந்த ராஜபக்ஷ‌ பதவியேற்றதன் பின்னர் முப்பது ஆண்டு கால யுத்தத்தை மூன்று வருடம் என்ற குறுகிய காலத்திற்குள் முடிவிற்கு கொண்டு வந்தோம்.
கடந்த கால அனுபவங்களைக் கொண்டு முறையாக போர் வியூகங்களை அமைத்து எதிரிகளுக்கு பதிலடி கொடுத்தோம்.
புலிகள் பின்னடைவுகளை சந்தித்து வருகையில் அரசியல், இராணுவ மற்றும் பொருளாதார ரீதியில் நெருக்கடிக்களைக் கொடுத்து போரை நிறுத்த சர்வதேசம் முற்பட்டது.
இதற்கும் அனுபவ ரீதியாக முகம் கொடுத்து சவால்களை வெற்றி கொண்டோம். எமது இராணுவத்தைப் போன்று எந்த சூழலிலும் செயற்படக் கூடிய வேறு இராணுவம் உலகத்தில் எங்கேயும் இல்லை.
பூரணமான நிபுணத்துவம் அடைந்த இலங்கை இராணுவத்தை இழிவுபடுத்தாது அனுபவங்களைப் பெற்றுக் கொண்டாலே உலக பயங்கரவாத சவாலை எதிர் கொள்ள முடியும்.
ஆனால் இன்று சிறீலங்கா இராணுவத்திற்கு சர்வதேசத்தில் அச்சுறுத்தலான சூழலே காணப்படுகின்றது. மனிதாபிமான நடவடிக்கையின் போது பொது மக்களை படுகொலை செய்ததாக சர்வதேசம், எம் மீது குற்றம் சுமத்துகின்றது. இதனை ஒப்புவிக்க போலிச் சாட்சிகளையும் ஆதாரங்களையும் கூட தயாரித்துள்ளது.
இந்த சவாலையும் அரசாங்கம் புத்திசாலித்தனமாக எதிர்கொள்ளும். பொதுமக்கள் இச் சூழலை புரிந்து கொள்ள வேண்டும். ஏனென்றால் இலங்கைக்கு எதிரான போலிக் குற்றச்சாட்டுகளுக்கு உள்நாட்டிலிருந்தும் உதவிகள் வழங்கப்பட்டு வருகின்றன.
தற்காலிக நலனுக்காக நாட்டை காட்டிக் கொடுப்பவர்களும் உள்ளார்கள். ஆனால் உலக நாடுகளின் இராணுவத் தளபதிகள் எமக்கு ஆதரவளிக்கின்றனர். அரசியல் ரீதியாக குற்றச் சாட்டுக்களை சுமத்தப்படுகின்றமையால் அவர்களாலும் ஒன்றும் கூற முடிவதில்லை என்றார்.